O le asō e sii ai le tau o le tusifolau Niu Sila.
E amata mai le asō, le aso 25 o Me o le tau e faatalosaga ai le tusifolau o le tagata matua o le a sii mai le $199 i le $206, ae o le tau o le tusifolau mo le tamaiitiiti o le a sii i le $120 mai le $115 sa iai.
O se siitaga ua faia se’i tau faapaleni ai le leai o se tupe maua i taimi o le Koviti lea na matuai pa’ū ai tusifolau faatalosaga seia oo mai ai ina toe faga faafuasei i luga ina ua toe amata ona tatala feoaiga faavaomalo.
O le va o le 2018 ma le 2019 e silia ma le 730,000 tusifolau na faatalosaga, peitai na sau a’i i le 2020/2021 e silia laititi ma le 150,000 talosaga.
O suiga foi ua aafia mai le faaiuga na fai ai le 2015 lea ua tuu ai i luga i le 10 tausaga le umi e aogā ai le tusifolau Niu Sila mai le 5 tausaga sa iai.
A o aloaia ai i le asō le siitaga ua faailoa mai, o lea foi ua faamautinoa mai o le a iai le isi siitaga faaopoopo i le tausaga a sau.
