O le tamaitai talavou o Parris Goebel, ua manumalo i le faailoga maoa’e, le Emmy Award mo le Outstanding Choreography for Variety or Reality Programming mo lana siva i le Savage X Fenty Show Vol. 3.

E palagi le suafa, ae o Parris Goebel o se tamaitai talavou e Samoa lona tupuaga. Sa soifua ane i Niu Sila, ae ua tele nei lona taimi ua aumau ai i Amerika ma filofilo ai ma igoa tetele i mea tau faafiafiaga, ona o lona tomai lea ua iloga ai, o le sisiva mai ma lana vaega e lagolago mai i tagata pepese iloga e pei o le tamaitai pese lauiloa o Rihanna.

O le taunuu ai o Goebel i lenei tumutumuga ua ia uu ai nei lenei faailoga, na ta’ua i sana tusitusiga i le Instagram e faaleo ai lona agaga mitamita ma le faafetai e faapea, o ni lagona maoa’e na ia lagonaina ina ua ia uuina lenei faailoga.

Ma e lei faigofie lona tauivi ina ia maualuga sana faatinoga i lea show e pei ona ua ia maua ai nei le faailoga. Sa ia ta’ua ai o le vaiaso tonu a o sauni atu mo le show, na aafia ai i se faalavelave matautia tau taavale, peitai e na te lei faataga tiga na aafia ai mai le faalavelave, e taofia ai lona agai i faataitaiga o le siva i le isi aso e sosoo ai.

Sa ia matuā lagona tiga o lona tino i le faalavelave na aafia ai, ae o le faatinoga o lana siva e lei iai se mea na faaletonu, e ui sa siva ma le matuitui o tiga, ae na matuā tuu atoa i ai lona malosi ma lona iloa ina ia faamae’a atoa le show.

Fai mai Goebel, e le gata na mae’a lelei le faatinoga o lana siva, ae na mae’a i se tulaga sili ona mata’ina…she didn’t only finish the show, she created a masterpiece.

Ta’ua e Goebel, ina ua savali ese mai le stage ma lana faailoga, na matuā maligi ona loimata a o mafaufau i le fitā o ana taumafaiga e fai o le tiga o lona tino, ae o le mafatia o ona faalogona a o finau ia faamae’a lelei le siva mo le show. Peitai na galo uma na tiga matuitui ina ua ia sii a’e lenei faailoga maualuga.

Ua matuā moni i lenei alo siva o Samoa le muagagana: E leai se mea e maua ma le filemu. Ae maeu le suamalie o le ola faaeaina, e galo uma ai tiga o galuega mamafa sa tauasa mai ai i le tele o tausaga.