O loo silasila nei le Malo i se tapenaga e mafai ai ona malaga uma mai i le atunuu le aulakapi liki o le Toa Samoa e aofia ai ma le pulega, mo se tali faaaloalo e faafetaia ai le faaeaea a tamafanau a le atunuu i le tapuaiga a Samoa, aemaise o le tulaga maoa’e o le taumafaiga ua ausia i le Ipu o le lalolagi i le taaloga lakapi liki.

Ua faailoa e le afioga i le Minisita o Alamanuia Pisinisi ma Leipa o loo avea nei ma sui Palemia le tofa Leatinuu Wayne Sooialo, i se feiloaiga i le Aso Faraile na tea nei a o lumanai le sailiga siamupini a le Toa Samoa ma Ausetalia, o se fuafuaga lea o loo tapena iai le Malo, ae o loo tālia le toe faaolatia i fanua o le lātō i le ea ma le opea i le ala o le afioga i le tamaitai Palemia ma le sui Palemia lea sa avea ma sui o le Malo ma le atunuu e tapuaia le sailiga o le siamupini, lea e ui ua le manuia le aulakapi liki a Samoa i le manumalo i le Ipu o le lalolagi, ae o lana taumafaiga ua tumau pea ona siamupini i loto o le tapuaiga a soo se tagata Samoa i le lalolagi ma lo tatou atunuu.

O tapenaga o loo silasila nei iai le Malo o le a tali ai ma le fesili, pe iai se aso malolo e aloaia ma amanaia ai le taua sa feagai ma le Toa Samoa, ma le lotonuu o alo ma fanau sa ofo e fai so latou sao mo Samoa i le Ipu o le lalolagi.

O Samoa le atunuu laititi muamua o le Pasefika ua na ausia se matati’a maoa’e i le lakapi liki o le taunuu lea o lana finau i le sailiga o le Ipu o le siamupini, ma o se tasi lea o mafuaaga tāua o le tapenaga ua faailoa e le tofa Leatinuu Wayne Sooialo. 

I le tapuaiga a le atunuu aoao e lei toe soona gāsē pe faalogoina ni leo o pu o taavale ma ni faaumuumu i le taulaga i Apia ona e le gata ua faamamalu sāsā o le sapati, ae ua malolo faatamalii le Toa Samoa.O nisi o vaega o le atunuu i afioaga ma nuu i tua i Upolu ma Savaii sa molimauina i ata faasalalau tuusa’o i luga o le api o foliga, le faafiafiaina o le tapuaiga ona ua faatietie Samoa i se tulaga sili ona maualuga e lana aulakapi liki o le Toa Samoa.