O lea ua sola le aulakapi ta’ito’afitu a le Tepatasi ma le siamupini o le taamilosaga ta’ito’afitu o le Teuila e pei ona sa faagasolo i le Aso Faraile ma le Aso Toonai ua mavae atu nei.
O le Tepatasi na su’e siamupini ma le ‘au a le Laulii Lions ma manumalo ai le Tepatasi i le 19 ‘ai i le 14.
I le vaega o tamaitai ua sola le ‘au o le Australia Development Sevens ma le siamupini lea na malolo ai le ‘au a tamaitai mai Samoa le No Idea.
O le ‘au a alii mai Ausetalia le LLYODIES ua maua le tulaga tolu ae i le vaega o tamaitai ua tulaga tolu le ‘au o le Striders.
I le taamilosaga o le Ipu a le Pasefika ua saofai nei le Manu Samoa i le tulaga tolu o le taamilosaga ina ua malolo ai le ‘au a le aeto mai Amerika ae o Fiti le Flying Fijians ua toe nofo ai le Ipu o le Siamupini o le Pasefika i lenei tausaga ina ua manumalo i le la taaloga ma le ‘au malosi a Iapani.
O le faatulagaga la o ‘au o lea taamilosaga, ua tulaga muamua Fiti, tulaga lua Iapani, tulaga tolu Samoa, o Amerika i le tulaga 4, Tonga i le tulaga 5 ae tietie Kanata i le tulaga 6.
