Ua sefulutolu tausaga o le taamilosaga lakapi o le Pacific Challenge ma o le taimi muamua ua faia ai i Samoa, ae ua faaiuina le taamilosaga i le toe sola ma le Fiji Warriors o le siamupini mo le sefulu ai lenei o tausaga.
Na faatoilalo e Fiti le ‘au a le Tonga A i le faaiuina o le taamilosaga i le Aso Toonai na tea nei, ma manumalo ai i ‘ai e 73 i le 25 a Tonga.
O le tatou ‘au o le Manuma Samoa na faatoilalo foi e le Fiji Warriors i le taaloga i le Aso Gafua i ‘ai e 50 i le 25 ma tatou maua ai le tulaga lua o le taamilosaga ina ua manumalo le Manuma Samoa i lana taaloga mulimuli ma le ‘au a Iapani le Junior Japan i ‘ai e 44 i le 3.
I le sauni atu o le tatou aulakapi tele o le Manu Samoa i le Ipu o le lalolagi i lenei tausaga, ua faailoa taaloga e 4 a le tatou aulakapi a o lei faagasolo le Ipu o le lalolagi i Farani ia Setema.
O le masina o Iulai i le Aso Toonai 22 o le taaloga ma Iapani e faia i lea atunuu, o le taaloga ma Fiti i le aso 29 o Iulai e faia i Apia, taaloga i le aso 5 o Aokuso ma le ‘au a Tonga e faia i Apia ma le taaloga ma le ‘au a Aialani e faia i Farani i le aso 26 o Aokuso.
