Ua lē motusia le agalelei pea o le malo o Iapani e tauala i ana fesoasoani mo le malo o Samoa, e pei ona molimauina i se foa’i o taavale fou e lua mo le galuega fuimu ma meafaigaluega mo lea auaunaga tāua i le atunuu.
O taavale fou e lua e ola i le eletise ma o se suiga fou lea i taavale o loo faaaogā e le pulega o le tineimu ma galuega lavea’i i taimi o faalavelave faafuase’i o loo pulea e le malo.
O le tau o ia taavale ma meafaigaluega e selau afe tālā tupe Amerika.
Ua faaopoopo atu lea foa’i i taavale e aofia ai loli fuimu ma meafaigaluega o loo faatino ai lea tautua i aso ta’itasi.
O le tama’ita’i Minisita o le Matāgaluega o Puna’oa Faalenatura ma Si’osi’omaga e aofia ai le pulega o tineimu ma galuega e tali atu ai i ni faalavelave faafuase’i, le afioga Seve Te’i Fuimaono sa fai ma sui o le malo o Samoa e saunoa faafetai i le malo o Iapani i se sauniga na tauaao aloa’ia ai lea fesoasoani.
