O le asō, Aso Lulu, 7 Tesema 2022, lea na faatulaga a le ofisa o femalagaa’iga a Niu Sila le Immigration New Zealand (INZ) e faia ai le Se’i mo avanoa e talosagaina ai visa nofomau o tagata mai le Pasefika aemaise lava Samoa, ina ia nonofo mau ai i Niu Sila.
O le avanoa lenei ua faamatuu atu e Niu Sila e mafai ai ona talosaga mai tagata o nisi o atunuu o le Pasefika o loo i lalo o lea feagaiga, ina ia mafai ai ona faatalosaga mo ni visa nofomau, e fua i luga o ni aiaiga ua faataatitia, e pei o le maua o se pepa faigaluega mo se galuega o loo mafai foi ona ausia e le totogi o lena galuega, le tupe o loo faatalitalia e le ofisa e fua i ai le maua o le avanoa e faamautu ai se nofomau.
Na lei faaauauina lenei polokalame i tausaga na iai taofiofiga o le faamai Koviti-19, o le pogai lea ina ua toe tatala nei le avanoa o le Kuota a Samoa e lesitala ai suafa mo le Se’i i lenei tausaga, na malilie le Malo ina ia iai se faaopoopoga o le aofai o i latou e mafai ona talosaga pe a faamanuiaina numera i le Se’i o le Kuota a Samoa mai le 1,100 sa masani ai, ae ua siitia i le 1,650 mo le Se’i o le 2022 e oo atu i le 2025, ina ia talatala iai avanoa ia na misi ina ua leai ni se’i i tausaga e 2020 ma le 2021.
Ae mo isi atunuu o le Pasefika, le Pacific Access Category (PAC) o lea ua siitia le aofai o i latou e mafai ona talosaga pe a faamanuiaina a latou numera i le Se’i, i le 1,300 avanoa i le tausaga lenei 2022 faapena i le tausaga fou 2023, e talatala i ai avanoa ia sa misia ona faia ai le Se’i i totonu o tausaga na taofia ai i le 2020 ma le 2021.
O atunuu o le Pasefika o loo aofia i lalo o lea polokalame e aofia ai Kilipati, Tuvalu, Tonga ma Fiti. O loo faatulaga e toa 150 mai Kilipati, 150 mai Tuvalu, ae 500 mai Tonga ma le 500 mai Fiti.
Mo le Se’i i le asō, o numera lesitala uma o le a faamanuiaina ai o le a lolomia i le upega tafailagi a le ofisa o le INZ i le Aso Gafua, 12 Tesema 2022, ona lafo aloaia atu ai lea o se tusi e valaaulia atu ai i latou uma nei o le a faamanuiaina ina ia amata loa ona faagasolo a latou talosaga i totonu o le taimi o le a faatulagaina.
