Ua mae’a le faiga filifiliga a le malo o Niu Sila e pei ona alo atu iai i le faaiuga o le vaiaso. 

Ma ua iai le suiga o le faigamalo a le atunuu ina ua mae’a lana faigāpalota. 

O le vaega faaupufai a le National Party lea ua sagai mai e taitai le malo i ana polokalame ma ana anavatau o lea ua mae’a ona faataoto e alafua ai le malo mo le isi paeaiga lea ua savalia. 

Ae o le itumalo o Magele o lea ua manumalo mai ai le afioga ia Lemauga Lydia Sosene i le nofoa o le itumalo i lalo o le faamalu o le Labour Party. 

O Lemauga sa manumalo mai le lisi o le itumalo i nisi o paega ua mavae atu, peitai ina ua faaseetuagalu le afioga ia Aupito Su’a William Sio o lē sa seei mai le nofoa o lea itumalo, ae ui atu lana ula ia Lemauga Lydia Sosena ma tuu atu aloaia ai le tofi auā le faaauauina mo le isi faigāpalota e pei ona faatinoina nei.  

Ua faaalia le loto fiafia o le afioga ia Lemauga Lydia Sosene ina ua faamanuiaina le faiga filifiliga sa alo atu iai lona itumalo. 

E ui lava ua lē toe tulai mai le Labour i le taitaiina o le atunuu, ae o le itumalo lava latou o Magele ua fiafia lava ua maua le avanoa e fai ai o ia ma faipule o le itumalo. 

Saunoa Lemauga sa tapena lava ma le fiafia ma le faamaoni i le faiga filifiliga, o le ā lava le mea e iai le faigāpalota e talia lava ma le fiafia. 

Faailoa e le faipule lona agaga faafetai i le afioga ia Aupito Su’a William Sio i le tele o lana fesoasoani i lenei tapenaga, faapea foi le lagolago a lona itumalo. 

E tele luitau sa feagai ma ia ae sa ia lagonaina lava le faamalosi mai o nai ona mātua faapea lona aiga i lenei faamoemoe, ma le upu e faapea faatuatua ma tatalo i le Atua, ma tautuana le gagana ma le aganuu a Samoa e tatau ona faaauau pea. 

O le Aso Gafua lea ua fuafua e malaga ai i Uelegitone e tapena ai nisi o fuafuaga o lea ua sauni le faiga malo fou e faataatia mo le atunuu. 

E iloa foi e telē le suiga o le a iai ona o lea ua sui le malo. 

E toe iloilo le tele o mataupu ma anavatau poo ā tapenaga e tatau ona iai aemaise foi o galuega. 

E telē le polokalame sa faataatia mo le Labour peitai ua lē mafai ona tulai mai le vaega faaupufai i lenei taimi e faaauau le taitaiina o le malo. 

Ae o loo iai pea galuega faifai pea, ma nisi o mataupu i totonu o le malo e tatau ona unai lona faaauauina. 

O le a taumafai foi e tu malosi e fai sona sao mo lona itumalo faapea lona atunuu aemaise o tagata Pasifika na afua ai ona auai i totonu o le Palemene a Niu Sila.