I le mae’a ai o le 11 tausaga o taalo Ardie Savea i le ‘au a le Matagi poo le Hurricanes mai Ueligitone, o lea ua see ane nei le alii e taalo mo le ‘au a le Moana Pasifika seia paia le tausaga 2027.
I pepa o faamatalaga mai le Moana Pasifika na faaalia ai lo latou fiafia tele e faailoa le auai atu o lea alii taalo, o sē ua telē foi lana tautua i Niu Sila e lē gata i le taamilosaga o le Super Rugby Pacific e tauala mai le ‘au a le Hurricanes, ae o lana tautua foi i le ‘au tele a le atunuu le All Blacks.
I talaaga i le olaga taalo, e faamauina; o Ardie Savea o se tagata ua iloga lona sao i le taaloga lakapi.
Na amata taalo Ardie mo le Matagi poo le Hurricanes i le tausaga 2013, sa faaigoa ma avea lea alo o Samoa ma kapeteni o le ‘au i le tausaga 2021.
Na kapeteni foi e Ardie le All Blacks i le taamilosaga o le Ipu o le Lalolagi (Rugby World Cup) i le tausaga na se’i mavae atu nei.
Na ia tauaveina foi lea tofiga i le ‘au a le All Blacks i se tasi o taaloga na faamauina i talafaasolopito i ana taumafaiga le atoaga o le selau o ana taaloga faitaulia poo test match ma le ‘au a Aferika i Saute le Springboks i le tausaga 2021.
O le a faapena ona auai faatasi atu Ardie ma lona uso o Julian Savea, i le ‘au a le Moana Pasifika.
I faamatalaga na faailoa ai e lenei tama taalo lona agaga faafetai i le Moana Pasifika ona o le avanoa ua ia mauaina o le a tatala ai foi le avanoa ia te ia ma si ona aiga e auai i le ‘au.
O le alii o Ardie Savea e mai afioaga o Siumu, Luatuanuu ma Faleasiu Uta.
