Na savalia e le komiuniti a Saini Aukilani i le taeao ananafi e faaalia ai lo latou teena o le faiga faasolitulafono.
O fafo ane o le Aotea Square lea na laulaututu ai i latou nei ma valaau ua moomia se suiga e faia faasaga i tagata o loo faia pea nei faiga lē alolofa.
O lea savali na faaauau ai i Queens Street ma faamae’aina i le Train Station i Britomart.
Na faaleo foi lo latou le taliaina o osofaiga o loo faia i faleoloa laiti lea o loo aafia ai le toatele o tagata Saina.
O ananafi lea na alalaga ai i latou nei, ae o le Aso Toonai lea foi na sau ai tala o le tagata faatau oloa i le dairy i Hamilton na motu ona tamatama’i lima (tulou) i osofaiga a le augaoi sa faaaoga ai se agasese.
