Ua iloga ona logologoa le salalau ai o tala i upega tafailagi ma auala o faasalalauga e tusa ai o le tulaga o loo pagatia ma ma’umau ai soifua o tagata o loo aafia i le taua i Sasae Tutotonu i le va lea o atunuu o Palesitina ma Isaraelu.

O nai vaiaso talu ai, na faailoa ai i luga o upega tafailagi taumafaiga a nisi o le mamalu o le atunuu e tuuina le mau o loo fia momoli ona o le silasila lea i le aafiaga tele o fanau ma le soifua lautele o tagata Palesitina ina ua lē ‘asa se aso ma osofaiga a Isaraelu.

E silia ma le 800 tagata na lagolagoina lenei feau sa faasalalauina i luga o upega tafailagi.

I se pepa o faamatalaga ua faasalalauina nei, o le itula e 6 i le taeao a taeao o le a faatino ai loa se savali o le filemu e agai atu i luma Maota o le Malo ma tuuina ai se talosaga i le Malo ina ia lagolagoina le taofia tumau o le taua a nei atunuu.

O le masina o Oketopa i le faagasolo ai o le fonotaga a Malo Aufaatasi, na faailoa ai e lei auai Samoa e palotaina le sailia ai e nisi o atunuu a Malo Aufaatasi o se lagolago e taofia ai le taua o loo tupu pea.

O lenei savali e faaopoopo lea i le tele o faatinoga o loo faatautaia i le tele o atunuu o le lalolagi i ona auala filemu e faaali ai lo latou tutu faatasi e molimoli le feau e taofia ai nei faiga saua ma le lē alofa i fanau ma tagata lautele ua aafia fua ona o fevaevaeaiga.

 O loo auai ai i lenei faamoemoe Malu o le Malo aemaise le Sosaiete a le Koluse Mumu i Samoa.