O Monalisa Soliola o le isi igoa lea e lē taumate o le a faafofogaina tele foi i se taimi e lē o toe mamao mai lipoti a le aufaasalalau i le taaloga o le lakapi liki i le itupa o tamaitai. 

Ua lipotia e le ABC i le vaiaso nei o le tamaitai o Monalisa, 18 tausaga le matua o le a taalo mo le ulua’i taimi i le Dragons i le fetauiga ma le ‘au malosi a le Titans i le Aso Sa nei. 

Faailoa i le lipoti a le ABC se faamatalaga a Monalisa na amata i le tausaga na te’a nei lana taalo i le ‘au a St Johns peitai o le maua o lona avanoa e taalo ai mo le Dragons o se fiafiaga tele mo ia. 

Fai mai a ia na te iloa o le taaloga e saoasaoa peitai o le avea o ia o se teine taalo o le NRLW e tatau ona ia talitonu i lona tagata ma sa faigata foi le galuega sa faatino ia oo ai i lea tulaga.

O Monalisa se tasi o le faitau afe o tupulaga Samoa i Ausetalia nei o loo tausinio i faagatama e lē gata i le lakapi liki a o isi foi taaloga ua tulaga lelei ai ma faamanuiaina ai alo o Samoa i totonu o Ausetalia ma faavaomalo.