Ua faailoa e le Komesina o leoleo susuga Auapaau Logoitino Filipo ua faatulaga le aso 18 o le masina fou o Oketopa e tulai ai i le faamasinoga faaitumalo se tamaitai Samoa e faamautu i Amerika ae o loo malaga asiasi mai i Samoa.
O le a tali lenei tamaitai i tuuaiga o lona faaaoga o se mea faitino o fesootaiga faatekonolosi faaonapo nei, e faatino ai ni faiga faasoesa poo le harassment, i ni sui o le pati faaupufai o le Faatuatua i le Atua Samoa ua Tasi.
O lea tamaitai e 48 tausaga o le soifua ua le faailoaina e leoleo lona suafa sei tulai i le valaauga muamua o lona moliaga, lea o le a tuuina atu ai sana tali, i le tuuaiga.
O le lua ai lea o mataupu ua faaulu i leoleo e le vaega faaupufai o le Faatuatua i le Atua Samoa ua Tasi e mafua i gaioiga ma faamatalaga ua faia faasaga i ni sui o lea pati faaupufai ua oo i le faamasinoga, a o tālia ai le isi tagi ua faaulu e le Minisita o Galuega Tetele faasaga i le taitai o le Itu agai, e mafua lava i tala lafo ua tuuaia o ni tala taufaaleaga lea ua i aao o le Loia Sili mo se isi iloiloga faaletulafono, ae ua iai le fautuaga a leoleo e faia ni moliaga.
O le Aso Gafua o le vaiaso nei na fautuaina ai le tamaitai ua molia i ona aia faaletulafono ina ua mautu suesuega a leoleo ma faia ai ona moliaga. O loo tatala o ia i tua i aiaiga e saini i le ofisa o leoleo i Faleolo i vaiaso taitasi, ma taofia ona pepa malaga ma le tusifolau.
