O le faaiuina ai o le fonotele mo le ola manuia o fanau a le UNICEF o se tasi o faalapotopotoga a Malo Aufaatasi sa usuia i Fiti i le vaiaso na tea nei, ua manumalo ai le ofo a Samoa e talimalo i le isi fonotele o le tausaga e 2025.
O se fono tāua ua mae’a atu nei auā sa tele se sao o Samoa i talanoaga mo le faataatiaina o faiga faavae e fausia ai ni polokalame e saga tulei atili ai le ola manuia o fanau a le lalolagi aemaise o atunuu o le Pasefika e aofia ai Samoa.
O le Minisita o Tupe, le Minisita o Aoga Taaloga ma Aganuu, faapea le Minisita o le Soifua Maloloina sa auai i lea fonotaga faavaomalo i le faamoemoe o le Malo o Samoa e unaia sona sao i le faatinoina o polokalame e siitia ai le ola lelei o fanau a le atunuu, e le gata i le soifua malolona ma aoaoga, a o isi taumafaiga uma mo le ola manuia o fanau a le atunuu ma le Pasefika.
O le tasi o vaega tāua sa faailoa e le Minisita e fesootai i le tāua o lea fonotaga, o le atina’e o fanau a Samoa e pei ona faailoa e le Minisita o Tupe i se talanoaga i le mae’a o lea fonotaga, o le tulaga i le itiiti o pasene o fanau a le atunuu o loo maua avanoa i aoga amata poo aoga faataitai ona o se tasi lea o fesili, pe aisea o loo maualalo ai pea le numera o fanauiti e ulufale i ia aoaoga, i le taimi tāua o le faatoa ulufale i aoaoga e tāua le faafailele ai o lo latou ola aoaoina.
O le Minisita o Tupe o Samoa ma le Minisita o Tina ma Tamaitai ma Fanau a le Malo o Fiti, ua toe filifilia e tauaveina faatasi tofiga o taitaifono soofaatasi o le fonotaga a le UNICEF mo le isi 2 tausaga, a o lei talimalo lo tatou atunuu i le fonotele faavaomalo o sosoo ai i le tausaga e 2025.
