Ua sauni pisinisi i le taulaga o Apia e tali faamanuiaga tau tupe mai pasese o le meli tele mai Amerika o le Crown Princess o le a taunuu i le uafu tele i Apia i le taeaopo o le Aso Lulu o le vaiaso nei.
O le lona fa a’i lea o meli ua afea Samoa talu ona toe tatala tuaoi i malaga masani i le masina o Aokuso, ina ua aveesea uma noataga o puipuiga o le atunuu mai le faamai Koviti-19.
E silia i le tasi le afe pasese ma le auvaa e silia foi i le tasi le afe o le a malaga mai i lea meli tele.
O le tasi lea o alamanuia o le atina’e o tagata tafafao o loo tafe atu i le tamaoaiga o le atunuu, ma manuia ai pisinisi eseese aemaise o le faatauina o oloa o galuega taulima, o lavalava, ma taumafa faapea le tautua a pasi ma taavale laiti laupasese.
O le kamupani vaa o le Betham Brothers o loo auala mai ai lea meli laupasese ma o le meli mulimuli foi lea mo lenei tausaga a lea kamupani vaa i le atunuu.
O lea ua taoto le taiala ua mae’a ona faalauiloa e le Pulega o Tagata o Tafafao, e lima taitaiina ai taumafaiga mo le siitia o le auaunaga mo tagata tafafao e afea Samoa e ala i meli laupasese.
