Ua filifilia lē sa avea ma pulenuu o Aukilani e avea ma hai komesina i Peretania.
O le faasalalauga lea mai le malo e tusa ma le filifilia ai o Phil Goff poo lē sa pulenuu mai le 2016 seia oo mai i le masina lenei, lea faatoa faamavae ai mai le tofiga pulenuu.
O Phil Goff o se tasi sa tauavea le tofiga minisita o le va i fafo ma fefaatauaiga ma o lea foi sa ia taitaia le pati a le Labour a o faipule ai mo le 32 tausaga.
Na saunoa le minisita o le va i fafo a Niu Sila o loo iai nei, Nanaia Mahuta, ua fetaui le tofia o Goff i le taimi o loo faia ai maliega o fefaatauaiga saoloto a Niu Sila ma Peretania.
O le masina o Ianuari o le tausaga fou e amata aloaia ai tofiga o le hai komesina fou ua faailoa mai.
