Ua faatupula’ia solitulafono tau taavaleafi e pei ona faailoa e le Matāgaluega o Leoleo, Falepuipui ma le Toefuata’ina.
O lea faatupula’ia ua faulala’i ai ma sala tupe a nisi o avetaavale ua lē totogia ma ua aumai faalaua’itele ai ma se lapata’iga mai le matāgaluega, o le a faasalalau suafa o avetaavale ia ua lē totogia a latou sala.
O le masina fou o Me ua faailoa e le matagaluega e amata ai ona faasalalau suafa o avetaavale ua lē usita’ia le totogi o a latou sala tupe, ma mae’a le taimi e tuuina atu e faatino ai lea tulaga ae lē faia, o le a oo loa i le faamasinoga ma sili ai ona telē se aafiaga pe a faamaonia.
O solitulafono e pei o le leai o se laisene, lē laiseneina o le taavale, lē faia le fusipa’u e puipuia ai le saogalemu, talanoa i le telefoni ma ave le taavale, ma le ave taavale faatamala, o solitulafono ia o loo tele iai faasalaga tupe ua lē lelei ona totogi.
O le tali filemu e liliu ese ai le ita, o lona uiga alu nei e totogi le sala tupe ona lē aliali mai lea i fafo o le suafa aemaise o avetaavele o loo faaaogā suafa matai faapelepele o aiga ma nuu.
