Ua faailoa e le Tausala o Samoa le tamaitai ia Haylani Pearl Kuruppu lona sauni ai e fai ma avefu’a o Samoa i le sailiga o se lalelei o le Pasefika lea o le a fuafua e talimalo ai le atunuu.
E pei ona silafia ua tolu tausaga talu ona taofia lenei tausinioga tāua ona o le pepesi ai o le Koviti ma o le Tausala o le Pasefika 2019 le tamaitai ia Fonoifafo Nancy McFarland-Seumanu sa ia tauavea lava le pale mo lea tolu tausaga.
O le faaiuga o le masina nei faasolo atu i le amataga o Fepuari o le a faatino ai loa le sailiga o le Tausala o le Pasefika 2023.
Ta’ua e Haylani i luga o upega tafailagi o se amataga lelei lenei mo tamaitai mai le Pasefika e omai faatasi ai ma fai ma pinefaamau o le autasi o tagata Pasefika.
Talu ona amata faavae le polokalame o le sailiga o se tausala o le Pasefika i le tausaga e 1987, e faafitu ona manumalo Tausala o Samoa ma na suia mai foi le igoa mai le Tausala o le Pasefika i Saute i le Tausala o le Pasefika ua iai nei.
O le aso 29 Ianuari – 4 Fepuari o le a faagasolo ai polokalame o lea tauvaga tele.
