Ua toe lua vaiaso atoatoa o lumanai nei o le malologa a le Palemene talu ona tolopo le fono aoao faitulafono a o lumanai le Kerisimasi, ona toe tauaofia lea i le aso 23 o le masina nei o Ianuari e soalaupule le tala faaopoopo muamua o le tupe lea ua mae’a ona faataoto i luma o le laulau a fono a le Palemene e le Minisita o Tupe.
E 42 miliona 542 afe ma le valu selau sefulutasi (811) tala le aofaiga o le seleni ua faatatauina i lea tala faaopoopo o le tupe mo le faaauauina o galuega o le tausaga faaletupe o loo faagasolo nei.
Ua aofia i lea fuafuaga tau tupe i le tala faaopoopo muamua vaega tupe mo totogi o minisita faaopoopo e toalua o le Kapeneta lea ua 15 ai Minisita ua aofia ai ma le Palemia.
Ua aofia ai foi ni vaega tupe mo totogi o minisita lagolago faaopoopo, faapea ni vaega tupe mo le siitia o launi o sui faipule o loo i totonu o komiti faapalemene.
O loo faaalia i le fuafuaga o le tala faaopoopo muamua ua mafua le siitaga i alauni ona o le faaopoopo pea o fonotaga a komiti faapalemene.
Ua aiaia foi se vaega tupe faaopoopo mo le toe fetuunaiina o le totogi o le Peresetene o Faamasinoga o Fanua ma Suafa.
E ono matagaluega a le Malo o le a faasafua iai le 2 miliona 756 afe lima selau onosefulu tasi tala, mo nisi o a latou fuafuaga tau tupe.
O matagaluega ia e aofia ai le Matagaluega o Pisinisi Alamanuia ma Leipa, o le Matagaluega o Aoga Taaloga ma Aganuu, le Matagaluega o Tupe, le Matagaluega o le Va i Fafo ma Fefaatauaiga, le Matagaluega a le Palemia ma le Kapeneta, ma le Matagaluega o Faalapotopotoga Tuma’oti a le Malo.
