O le ta o le ono i le afiafi nanei ua faatulaga ai le ava o le feiloaiga e talimalo ai le MSNSW i le aulakapi taitoafitu a le Manu Samoa.

O le faamoemoe e pei ona faalauiloa mai i se pepa o faamatalaga mai le asosi lea o le a faafeiloai aloaia atu ai i le taunuu mai o le autaitoafitu a si o tatou atunuu ua malaga mai mo le faaauauina o le isi vae o le taamilosaga HSBC Sevens lea o le a faataunuuina i Sini nei i le faaiuga o le vaiaso.

Faailoa e le peresetene, Martha Roache o le ‘ava o le feiloaiga o le a faatautaia i le Parkroyal i Darling Harbour ma ua valaau foi i nisi o pisinisi a tamafanau a Samoa, faalapotopotoga aemaise le lautele o le atunuu e lagolago atu i lea faamoemoe e faailoa ai le amanaia foi o le faiva o alo ma tamafanau a Samoa o loo i le ‘au. Faailoa e Roache e taliaina foi soo se fesoasoani ma le aao foai o le atunuu auā lenei faamoemoe.

O le Miss Samoa NSW o se faalapotopotoga not for profit organisation ma o le faamoemoe ia maua se fesoasoani mo le feiloaiga i le afiafi ananei ae faapea foi i se taumafataga ma se foai tupe mo le ‘au aua le oo mai ai i Sini nei.