A o loma ai le faamanatuina o le Aso Faapitoa mo Tina i le lalolagi i le Aso Sa o muamua, ua tuuina mai ai se pepa o faamatalaga mai i le Matagaluega o Tina ma Tamaitai, Atina’e o Afioaga ma Aga Fesootai e ala lea i se polokalame e faamanatu ai le sao o tina i le atunuu.
O le sini autu o le Aso Faapitoa o Tina i lenei tausaga “O le Matofi o Fausaga Mau”.
E pei ona ta’ua i lenei pepa o faamatalaga o le faamanatuina ai o le 60 tausaga o le Malo Tutoatasi o Samoa o se tasi lea o faamanuiaga ua aeae ai le atunuu ona o le sao tāua o tina ma tamaitai i le sailigamalo a Samoa i lana tautua i soo vaega o le kelope.
O le pine faamau o le avea ai o le tamaitai ma uluai Palemia o Samoa, Afioga ia Fiame Naomi Mataafa.
O loo faamauina pea le siitia o sauaga faasaga i tamaitai i le maualuga e 60 pasene i le Suesuega o le Saogalemu o Aiga (2017).
Ae le gata i lea, o loo faamauina foi i lea lava suesuega le maualuga o sauaga e faatino e tina ia latou fanau i le 31 pasene.
O loo faamauina le laiititi atu o le numera o tamaitai i le 3 pasene pe a faatusatusa i alii i le tuufaatasiga o Ekalesia uma (SBS, 2021).
Ae peitai, o loo faamauina le maualuga o le numera o tina i le 65 pasene e auai i mafutaga e pei o le Mafutaga a Tina ma le Aufaipese (MWCSD, 2017).
O le asō lea ua amatamea ai tina i le motu tele i Salafai i la latou polokalame ae o le Aso Tofi lea ua fuafuaina mo Upolu.
O le polokalame mo le faamanatuina o le Aso Faapitoa o Tina i Samoa, o loo taimua ai le Matagaluega o Tina ma Tamaitai, Atina’e o Afioaga ma Aga Fesootai ma ana paaga.
