“Pe a luluina papa faavae”, o le igoa lea o le Feti’i fou poo le album a le faaili ma le aufaipese lauiloa le Punialavaa o le a faalauiloa i Samoa i le masina fou, i le vaiaso o faafiafiaga e sami a’i le 60 tausaga o le Malo Tuto’atasi o Samoa.
O le a faalauiloa tonu foi lea feti’i fou o fatuga faasamoa a le Punialavaa i le latou koneseti tele i le masina fou lava ua lagolago e le faletalimalo o le Lava Hotel i se tapenaga fai faatasi ma le Pulega o Tagata Tafafao mai Fafo, faapea nisi o kamupani e pei o le Digicel.
O le Aso Toonai le aso 3 o Setema o le a faia ai lea faafiafiaga o fatuga a le Punialavaa i le nofoaga o le Lava Hotel. E faia tonu le koneseti a o lumanai le vaiaso o faafiafiaga o le Tuto’atasi.
Ni finagalo o le ofisa sinia o le Pulega o Tagata Tafafao fafo le susuga Seiuli Dwayne Bentley ma le Pule Faatonu o le Lava Hotel le afioga Pepe Christian Fruean. Ae i le feiloa’iga ma tusitala e faalauiloa ai le faamoemoe, na faaalia e le faletua o Vini Lale Peteru o le Punialavaa, o le koneseti ua tapena mai iai o se avanoa tāua tele, auā o le a fai ai se sao i le faailogaina o le onosefulu tausaga o le Tuto’atasi, ae o le faatumauina o le tāua o le faaolaola pea ma faatumau le aulelei ma le matagofie o fatuga faasamoa.
Le faletua o Vini Lale Peteru o le Punialavaa. O le tausaga e 2018 na latou maua ai le faailoga taualoa o le Pacific Music Awards i Niu Sila i le atoaga o le 50 tausaga talu ona faavae le Punialavaa.
O le koneseti i le masina fou o le a faalauiloa ai foi le faamae’aina o le feti’i o fatuga a lea lava aufaipese lauiloa, ua faaigoaina o le “Tagi le atunuu Pele” lea sa faamoemoe e faalauiloa i le tausaga e 2020, peitai na lē taunuu ona o le pipisi o le faama’i Koviti-19.
