O lea ua faailoa lautele i auala o fesoota’iga televavave le faamanuiaga a le Ofisa o le Komesina Maualuga o le Malo o Peletania i Samoa, ua ave i le faia’oga ma le pulega aemaise o le ‘au masii a tamaitai Samoa i le matutua e i lalo o le sefuluiva tausaga, ua sauni e tuua le atunuu mo le taamilosaga o le Ipu o le lalolagi i le taaloga kilikiti faapeletania e faia i le atunuu o Meleisia.
O le taimi muamua lea ua ausia ai e Samoa se tulaga maualuga i lea taaloga i le agavaa ai e tausinio i le Ipu o le lalolagi ma o se matati’a ua ausia e le atunuu talu ona atina’e le taaloga kilikiti faapeletania e ese mai le kilikiti faasamoa.
O le aso 18 o le masina nei o Ianuari e amata ai le taamilosaga ae mae’a i le aso 2 o le masina fou o Fepuari.
