Ua lipotia e le CNN i le asō o le masina fou o Aperila lea ua fuafua e tuvae ai i Haiti le vaega o fitafita a le Gang Suppression Force poo le GSF lea e lagolago e Malo Aufaatasi, mo le faamoemoe e tau faasaga i kegi i totonu o lea atunuu ua avea ma faafitauli mo le to’atele o tagata.
Fai mai nisi o le tulaga foi lea na tupu muamua na o atu ai vaegā’au faapea e taofi vesiga i le va o kegi ae le’i manuia.
E manatu Malo Aufaatasi o le Force poo le vaega fou lea o le a o ane ua lava tapenaga ma le lagolago ua tuuina iai ma ua faaopoopo foi le aofa’i.
E tele atunuu o loo galulue faatasi i le matāupu lea e aofia ai foi ma Amerika, Kanata, El Salvador, Guatemala, Jamaica, Kenya, Bahamas ma isi.
O le atunuu o Haiti pe ā ma le 11 miliona lona faitau aofa’i ma ua umi tele o feagai ma faafitauli o vevesi a kegi i lo latou atunuu lea foi na i’u ina fasiotia ai ma le Peresetene sa iai o Jovenel Moise i le 2021.
O le 2022 ina ua faaletonu le tamaoaiga ma faateteleina vevesi na valaau ai loa le Peresetene sa iai i lea taimi, Ariel Henry mo se fesoasoani tau militeli faavaomalo.
Puna o Faamatalaga: https://edition.cnn.com/2026/03/24/americas/haiti-gang-violence-gsf-un-mission-intl-latam
