O le a faalealea e le alii talavou o Anthony Vitale, le fu’a a Samoa, a o finau ai e saili sona tulaga i le sailiga siamupini a le lalolagi, i le taaloga o le MMA – Mixed Martial Arts, o le a faia i Bangkok, i Thailand, mai le aso 6 – 10 Tesema 2023.
O le alii talavou o Anthony na soifua ane i Samoa, ma o ona tupuaga e mai afioaga o Levi Saleimoa ma Taufusi i Apia, ae o le tele o lona olaga na tuputupu ane ma o loo nofo ai pea i Aukilani i Niu Sila, ma o Niu Sila foi na amata ai ona fiafia Anthony i lenei taaloga na amata mai i le kick boxing ae o le taimi nei o lea ua taalo i le MMA poo le mixed martial arts ona o le lagolagosua o lana vaega o loo latou faamalositino faatasi i le gym i Aukilani i Saute, le Oliver MMA SA.
E tusa ua 3 ma le ‘afa tausaga talu ona taalo Anthony i lenei taaloga ma ua tele foi taimi ua faatino ai e Anthony le MMA ma nisi o ana paga sa ia lu’iina.
O le masina o Iuni o le tausaga nei, na manumalo ai Anthony i le Pine Auro i le 2023 GAMMA Oceania MMA Championships e avea ai o ia ma sui o Samoa.
O le GAMMA o se faalapotopotoga tele i le lalolagi o loo faafoeina taaloga nei o tomai tau Mixed Martial Arts, e auai ai i latou e fai ma sui o o latou atunuu i le sailiga siamupini mo le manumaloina o le pine auro, siliva ma le apamemea, ma saili ai foi le tulaga o lo latou atunuu i le faatulagaina o i latou o loo taaalo i lenei faagatama.
O le tausaga la lenei, o lea o le a auai atu ai e fai ma sui o Samoa, le alii talavou o Anthony Vitale, i le sailiga siamupini o le a faagasolo i Bangkok i Thailand i le masina fou o Tesema 6-10, 2023.
Na maua le avanoa e faatalanoa ai e le sui o le Radio Samoa le alii talavou o Anthony ma lona faiaoga, susuga Ben Sosoli o se isi foi alo o Samoa, ma na ta’ua e le alii faiaoga, ua nofo sauni lana ‘au mo le tausinioga, aemaise lava le alii o Anthony lea ua filifli lava e tauave le igoa o Samoa i lana taaloga.
Ae pei lava o taaloga uma o loo auai atu ai alo ma tamafanau a le atunuu e tauave le tagavai o Samoa ma saili sona tulaga i le faatulagaina i le lalolagi aoao, e le taugofie le faatupeina o nei faamoemoega.
O lea la o loo faatagisia ai e lenei alo o Samoa, le lagolagosua a ona aiga uma, o uo ma le mamalu atoa o le atunuu e mulimulitaia lenei faagatama, ma soo se tasi e fia tuu mai lona tau’au e foai se seleni ina ia mafai ona sologa lelei tapenaga uma a Vitale mo lona faamoemoe.
E le gata i tagata taitoatasi e fia foai aemaise lava foi i faalapotopotoga ma pisinisi, ina ia latou fesoasoani i le faamoemoe o lenei alo o le atunuu o le a ia tauina toatasi le taua e tauave ai le igoa pele o Samoa.
O nisi uma faamatalaga mo le faamoemoe o Anthony aemaise lava i ni seleni e foai mo le faataunuuina o le faigamalaga i le sailiga siamupini, o loo iai le numera a lona tina e faafesootai, 022 594 8344
