E tatau ona uma ane le masina ua faatulaga avanoa e faia ai ta’otoga o le faitau afe o gasegase ua silia ma le tausaga o faatali.
O lea ua tuuina atu e le pulega a le Te Whatu Ora – Health NZ le tusi i pulega e 20 sa ta’ua o pulega faaitumalo poo DHBs o loo faatalosagaina ai.
I lea tusi o loo ta’ua ai ia mautinoa e maua avanoa o le tusa ma le 7,500 tagata ua silia ma le 12 masina o faatali ma e tatau ona mautinoa aso e vaaia ai ae e le’i uma le aso 31 o Aokuso.
O lea foi ua faataoto le aso 30 o Setema e faagata ai le sailia o avanoa o le tusa ma le 4,000 ua silia ma le tausaga o faatali e vaai se specialist.
Ae i se tali a foma’i e tauala mai i le leitio faavaomalo a Niu Sila, o loo iai le popolega e ono lē mafai ona faafeiloa’i le mana’o o le pulega ona o loo tele lava foi isi cases o loo ave iai le faamuamua i le taimi nei.
