Ua faamamā le suafa o se alii mai le atunuu o Uzbekistan, ae o loo aumau nei i le nuu o Letogo, i moliaga e tolu o lona faiaiga faamalosi poo le toso teine i se tamaitai mai lo tatou atunuu ua 34 tausaga o lona matua.
O le alii o Khan Kahasanov o loo faaalia i le faai’uga tusitusia a le Faamasinoga Maualuga, sa faigaluega faatasi ma le tamaitai na faauluina le tagi, i le pu’eina o le ata faasolo i televise o le Survivor Australia lea sa amata pu’eina i Samoa mo le tolu masina ae o Iulai o le tausaga e 2022 na amata ai ona pu’e lea ata faasolo.
O le tausaga lea o loo nofo puipuia le atunuu mai le faama’i o le koviti, o le mafuaaga lea na nonofo eseese ai tagata sa faigaluega i le pu’eina o le Survivor Australia.
O isi sa nonofo i le Sheraton i Mulifanua, ae o isi sa nonofo i le faletalimalo o le Return to Paradise i Matautu i Lefaga, ma o le nofoa lea na tupu ai le solitulafono.
O le nofoaga foi lea sa faamautū ai lē na tagi ma lē na molia, ae sa eseese nofoaga o lea faletalimalo sa faamautū ai.
I iloiloga a le faamasinoga i mau a leoleo na tuuina atu, sa lē mafai e le faamasinoga ona fausia ai se faai’uga e talitonuina ai le faamatalaga tauto a le tamaitai na tagi, aemaise i le tapenaga a leoleo sa latou lē mafai ona tuuina atu elemeni sili ona tāua e tusa o aiaiga ma faasinomaga a le tulafono e mafai ai ona faamaonia tuua’iga ma moliaga e 3 o le faiaiga faamalosi.
O lea elemeni o le avatu o mau e lagolago ai le mau e lei lotomalie lē na tagi i le gaioiga a lē ua molia.
O le mae’a ona iloilo o mau sa tuuina atu na taunuu ai le faamasinoga i lana faai’uga na fofogaina i le aso 22 o le masina na te’a nei o Aokuso, e faalēaogā ma soloia moliaga uma a leoleo.
