E leai se suiga mo pasese e faimalaga mai Saina.
O le faaiuga lea a le malo e tauala mai le minisita o le Koviti, Ayesha Verrall ona o le mafuaaga e le o telē se lamatia i le soifua maloloina o tagata Niu Sila.
O le saoloto ai o le omai o pasese o lona uiga e le moomia ai le tau tapa o le siaki e negative o le Koviti e pei ona amata aloaia i le asō mo pasese e taunuu i Ausetalia.
Peitai e pau le suiga e pei ona saunoa le minisita, o le a iai fesootaiga e faia i luga o imeli o le a fesootai atu ai i nisi o pasese e taunuu mai Saina ma faatalosaga le tatau ona faia o siaki o rapid antigen test, ma o faaiuga o siaki nei o le a faaaoga e le soifua maloloina.
E oo lava foi i siaki nei e le faamalosia.
Na toe faamamafa e le minisita, e mafai lava ona aliae vairusi fou i soo se vaega o le lalolagi, ae le na o Saina.
I vaiaso a sau o le a faaaoga foi e saienitisi otaota mai vaalele o loo feoai i le va o Niu Sila ma atunuu i fafo mo suesuega, ma e ono suia e suesuega nei siaki rapid antigen test lea o loo tuu mai lava i le loto faitalia o le pasese.
