O lea faatoa o ese Nelson ma Tasman mai poloaiga o faalavelave faafuasei na iai.

E silia ma le lua vaiaso talu ai talu ona iai pitonuu nei o Niu Sila i lalo o poloaiga ma lapataiga ona o uiga louloua o le tau lea na iu ai ina pa le vai i Maitai ma tele ai ma palapala solo.

E ui o le aoauli ananafi lea faatoa faasaoloto ai mai nei poloaiga peitai o loo tumau pea fautuaga i tagata ia taumamao mai nofoaga o loo maualuga le lamatia mai palapala solo i Nelson aemaise o nofoaga o loo faia ai galuega faaleleia.

I ripoti tuuina mai e faapea o le tele o nofoaga e le o saogalemu o lea o loo faailoga i stickers.

E oo mai i le taimi e tuufaatasia ai tala fou ua silia ma le afa miliona ua foaia mo Nelson Tasman aua le faaleleia o mea ua faaleagaina.

Ae i tagata ua faatalosaga mo fesoasoani, e 25 talosaga ua tauaao ma o le maualuga lava o tupe o loo faatalosagaina i le taimi lenei o le $30,000.

O loo mafai ona faatalosaga tagata aafia mo fesoasoani i luga o le upega tafailagi a le Nelson City Council.