O se amataga lelei o lenei vaiaso mo le Toa Samoa faapea ana aulagolago ina ua o latou faatoilalo i le ‘au a Farani i le taaloga mulimuli o le Pulu A (Pool A). 

E lei tuumamaina e le Toa lea taaloga ma i le ‘afa muamua sa mamao ‘ai a le Toa i le 28 – 0 a Farani. Sa mataina ai foi le taaalo a nisi o tamafanau a le atunuu e pei o le alii o Taylan May, lea e 4 sikoa na ia maua mo le Toa Samoa ma isi sikoa e lua mai ia Brian Too ma Tim Lafai i le ‘afa muamua. 

E 6 isi sikoa a le Toa na maua i le ‘afa mulimuli mai ia Brian Too, Tim Lafai, Anthony Milford ma Chanel Harris Tavita. I le faaiuga o lenei taaloga na mautinoa ai loa le feiloai o le Toa Samoa ma le ‘au a le Mate Maa Tonga i le Quarter Final i le vaiaso fou. 

O le alii o Jarome Luai na manumalo i le faailoga “Tama taalo o le taaloga” (Player of the Match) ma sa fai ma sui o le Toa Samoa e momoli le faafetai i le autapuai i luga o upega tafailagi. 

Ta’ua e Luai o le a sauni e tapena mo le taaloga tele i le vaiaso fou ma e manaomia le lagolago a Samoa.