Na lipotia e le RNZ i le aso ananafi ua faamauina le silia ma le 14 afe o tagata ua aafia i le dengue fever poo le fiva o ponaivi i Samoa talu mai Ianuari ma ua faamauina foi ma le lona fitu o tagata ua aafia le soifua mai le faama’i.
O le lipoti mai le matāgaluega o le soifua mālōlōina e pei ona faailoa i le leitio faavaomalo a Niu Sila ua ta’ua ai mai le piliota o le aso 22-28 o Setema sa faamauina ai le faaitiitia o le aofa’i o tagata aafia e fua i le vaiaso i tua atu.
O le 74 pasene o tagata aafia e mai le motu i Upolu.
E lē o faailoa maia i le lipoti le matua o le soifua o le tagata lona fitu ua maliu i le faama’i ae ua faamauina foi le faaauau pea ona faatupula’ia le faama’i i isi vaega o le Pasefika.
O Amerika Samoa ua faamauina foi e le latou matāgaluega o le soifua mālōlōina e 212 i latou ua faamaonia le aafia e oo mai i le Aso Gafua na faato’ā mavae atu nei ae faailoa o le to’atele ua toe manuia.
O isi atumotu e pei o Rarotonga ua faailoa le faaitiitia o ē aafia, e manatu le failautusi o le soifua mālōlōina masalo o le polokalame faamamā sa faia talu ai aemaise o le tali ane a tagata i lapata’iga mai le matāgaluega ua maua ai sia tala fiafia ma atonu e lē o toe mamao, tafiesea atoa le dengue fever mai o latou laufanua.
Puna o Faamatalaga: https://www.rnz.co.nz/international/pacific-news/574895/samoa-records-seventh-death-from-dengue-fever
