Ua lipotia i le leitio faavaomalo a Niu Sila i le asō se faamatalaga mai le Ofisa Sili o le Matāgaluega o Galuega i Samoa, Fui Tupa’i Mau Simanu i se pepa o faamatalaga e faapea o loo faatino nei se lipoti a le International Tanker Owners Pollution Federation i le tulaga o iai le vaa o le Navy a Niu Sila le HMNZS Manawanui sa magoto i le itu i Saute o Upolu ia Oketopa o le tausaga talu ai ma o loo faatalia pea se faai’uga o le a faia i le vaa.

Ta’ua e Fui i lana faamatalaga lea afai ae folasia loa le lipoti a le vaega lea, o le a iai nisi faai’uga o le a faia ai.

Ua faailoa i le lipoti lea o le i’uga o le lipoti sa faalauiloa mai i le masina talu ai e tusa o lea faalavelave ua ta’ua ai e le’i lava toleniga mo le auvaa ma lē sa ta’ita’i, o le vaa foi e le’i iai i se tulaga e tatau ai ona faatino le gaioiga na faia ma sa le’i mata’itūina lelei e lē sa faafoeina le vaa le tulaga na iai.

O lea i’uga o le su’esu’ega ua faailoa ai le lē fiafia o nisi o tagatānuu o Samoa sa faatalanoa i le lipoti lea ma ua valaau ai i le vaega o le puipuiga a Niu Sila mo ni taui o aafiaga o lea faalavelave i tagata Samoa.

Faailoa foi e le Ofisa Sili o loo faaauau pea faatalanoaga i le matāupu lea i le taimi nei.

Puna o Faamatalaga: https://www.rnz.co.nz/international/pacific-news/560207/will-take-time-manawanui-s-fate-still-to-be-decided