Ua lipotia i le RNZ Pacific i le vaiaso nei le matāupu e faatatau i taui poo compensation mo komiuniti na aafia i le goto o le vaa a le Navy a Niu Sila le HMNZS Manawanui lea ua atoa le tausaga talu ona tula’i mai i gataifale o le motu o Upolu.
Ua faailoa i le lipoti se faamatalaga mai le malo o Samoa ua ta’ua ai o le a faamaonia le taui lea pe a mae’a pasia le tala o le tupe a le atunuu.
Na folafola e Niu Sila ua mae’a ona o latou tali atu i le talosaga a Samoa e faatatau i lenei faalavelave ma ua tuuina iai le peimeni e $6 miliona tālā Niu Sila e tutusa ma le lata i le 10 miliona tālā Samoa e taui ai komiuniti i le itumalo o Safata sa aafia si’osi’omaga ma lotoifale i le faaletonu o le vaa.
Ua ta’ua e le RNZ ua faailoa e le Ofisa Sili o le matāgaluega o loo feagai ma le matāupu i Samoa, Fui Tupa’i Mau Simanu o le isi sitepu e sosoo ai o le toe feiloa’i ma le komiuniti ma o loo fuafua sea feiloa’iga i le ogatotonu o le masina nei ona e fia auai ai ma sui mai le Navy a Niu Sila.
Na faailoa foi e Fui i lea lava lipoti o loo galulue pea le malo ma Niu Sila mo le faamautūina o nisi fesoasoani tau tupe.
Puna o Faamatalaga: https://www.rnz.co.nz/international/pacific-news/575437/samoa-govt-says-manawanui-disaster-compensation-to-be-finalised-after-budget-approval
