Ua faasala tupe i le 300 tala se alii mai le atunuu o Vietnam lea na maua i le malaevaalele i Faleolo o ia umia laau faasāina o le maruana e tusa lona mamafa ma le 6 tesimale 1 kalama.
O ananafi na faasala ai e le faamasinoga lea alii ma le tuutuuga, a mae’a ona totogi lana sala tupe ona aveesea faamalosi lea pe tipoti ese ma Samoa.
Faaalia e lana loia ina ua fesiligia i le mae’a ona lau le faasalaga o le Aso Toonai o le vaiaso asau e malaga ese ai lea alii ma foi atu i lona atunuu.
O lea tagatanuu o Vietnam sa galue i Amerika Samoa ae o lona afea o Samoa i le aso muamua o Setema sa nofo ai i Apia mo le 2 aso e faatali ai lana vaalele e malaga ai i Fiti e pu’e ai le isi vaalele e faaauau ai lana malaga i Vietnam.
Peitai ua faaalia e leoleo, o le lua aso lea na nofo ai i Apia na sauni ai e malaga i Fiti i le aso 3 o Setema, ae oo ina siaki ana ato i le malaevaalele ae maua ai ni fagu se lua sa iai le kofe, o loo teu ai maruana a lea alii talavou 28 tausaga le matua.
