O le a faigofie ma manuia ai fanau aoga o loo aotauina i le inisiniaina o vaalele i le maliega fou ua mae’a sainia nei i le va o le Ea Niu Sila ma le Nelson Marlborough Institute of Technology.
O le Aso Toonai na sainia ai le maliega lenei ma o se faiga o le a galulue faatasi ai pulega e lua ae o loo tatala ai le faitotoa mo fanau aoga o loo ave le faainisinia.
O le iunivesite lenei o loo koleni ai le silia ma le 150 fanau aoga i le tausaga e le gata o le fauina, faaleleia ae faapea le faatumauina o le tele o totoga o le vaalele.
Ua sainia ai foi i le taimi o loo faasauni atu i le tausaga fou lea foi o le a amata maua ai e fanau aoga i Vasega 12 ma le 13 le avanoa e aoaoina atili ai le faatonutonuina o vaalele a o su’e ai su’ega o le NCEA.
Mai le Ea Niu Sila o se fiafiaga tele lenei laasaga, e le gata mo le manuia o fanau ae o le a faigofie ai foi ona saili ana inisinia faatoa faauu.
