E silia ma le 70 atunuu e aofia ai atumotu e fitu mai le Pasefika ua sainilima nei i le maliega ua faaigoa o le biodiversity beyond national jurisdiction agreement lea foi e faaigoa o le UN High Seas Treaty.
O le masina o Iuni o le tausaga talu ai na amata ai lea feagaiga i le mae’a o le toeitiiti 20 tausaga o faatalanoaina pea ae o lea faatoa faatino le sainiga.
O le Federated States of Micronesia le uluai atunuu na saini i le maliega sosoo atu ai ma Palau, le Atu Solomona, Fiti, Tuvalu ma Samoa, faapea foi Niu Sila ma Ausetalia.
Ua saunoa ai le Komesina o le Vasa Pasefika o Dr Filimoni Manoni i le lipoti a le RNZ e faapea o le vasa ma mea o loo ola ai i totonu, o ni vaega tāua i le tele o aiga i le itulagi o le Pasefika ae latou te lē iloa tuaoi ua faatulaga i lalo o le tulafono o le sami.
O le feagaiga la lea ua amanaia ai o tatou komiuniti o loo iai le malamalamaga ma iai matafaioi e faia i le faasao ma le faatumauina o le siosiomaga ma tua atu o tuaoi.
