O le alii taalo o le Highlanders ma o se alo foi o Samoa, Marino Mikalele-Tuu ua faailo i le vaiaso nei o le a agai atu i Iapani e faaauau ai le soifua taalo ina ua sainia sana konekarate ma le Mitsubishi DynaBoars mo le tausaga fou.
O le a agai i Iapani pe a mae’a le taamilosaga o le National Provincial Championship i Hawke’s Bay.
O le tausaga na tea nei na valaau ane ai Marino i le All Blacks XV a o alu le malaga taamilo i le UK ma Aialani.
O lona uiga la o le a faaopoopo atu Marino i isi tama taaalo a Niu Sila ua faailoa foi o le a aga atu mo Iapani, e pei o Richie Mounga, Brodie Retallick, Aaron Smith ma Shannon Frizell.
Na faailoa e le alii taalo lona agaga faafetai i tausaga e ono sa taalo ai mo le Highlanders.
Talu ona amata Marino i le lakapi i le 2018 ua 47 taaloga ua taalo ai mo le Highlanders lea na fetaui ma le Blues i le aso ananafi, e faamautu sona avanoa mo le taamilosaga o loo faasolo.
O le taaloga lea na manumalo ai le Blues i ‘ai e 16 i le 9 a le Highlanders.
