Na sainia ananafi le vaega muamua o le poloketi tasi miliona tala a Faasaleleaga 5 ma Aana Alofi 2, o itumalo ia e lua mulimuli mai le 51 itumalo o le atunuu.

E silia i le lua tausaga o to’a poloketi a ia itumalo ona o nisi o luitau sa feagai ma tuai ai ona faamatuu mai e le malo a latou poloketi mo atinae a latou itumalo.

Sa faafetaia e le tamaitai Minisita o le Matagaluega o Tina ma Tamaitai Ainae o Afioaga ma Aga Fesootai, Afioga Mulipola Anarosa Ale Molioo, taitaifono ma sui o komiti o fono faavae a ia itumalo i le lava papale ma le onosai i taumafaiga o a latou poloketi.

O le vaega muamua o le tasi miliona tala na sainia ma faamatuu atu ananafi e tusa lea ma le $150,000.

O lea seleni ua atofa mo le faagaioiina o ofisa o fono faavae, e ala i totogi o le aufaigaluega e toatolu atoa ai ma alauni a le komiti o fono faavae.

A mae’a le vaega muamua lea ona sosoo lea ma le sainia o le $425,000 mo poloketi ma e faia lea tulaga pe a mae’a atu lipoti o le faaaogāina o le $150,000 na sainia ananafi.

O itumalo e lua nei ua mae’a fausia ofisa peitai sa iai nisi o mataupu faalotoifale o itumalo na mafua ai ona to’a le poloketi.

O le susuga Aiono Tile Gafa o le sui faipule o Aana 2 o le Taitaifono foi lea o le Komiti o le Fono Faavae a lea itumalo na saunoa e fai ma sui o itumalo e lua.

Sa ia faafetai le malo ma le Komiti Galue o le Poloketi ona o le lava onosai i mataupu sa tulai mai.

Na ia ta’ua ai le tele o luitau peitai e iai le lagona o le a lē toe tepa i tua ae o le a tulimatai le lumanai manuia o atinae mo itumalo e ala mai lenei faasoa a lo tatou Malo.

E tusa ai ma faamaumauga a le Matagaluega ua lata i le 49 miliona tala le tupe ua faamatuu atu i itumalo e 51, o lea seleni o loo i lalo o le $51 miliona na faatulaga mai i le tala o le tupe 2022/2023.

Ae o le asō lea o le a saini ai le miliona lona lua a itumalo e 22, o ia itumalo  ua agavaa ma mae’a tapenaga mo le miliona lona lua mo Atinae o Itumalo.