Ua valaau nei le malo tele o Amerika ia Saina ia faasa’oloto ane ta’ita’i e to’a 30 o se tasi o Ekalesia tele i Saina, lea na lipotia le taofia i le faai’uga o le vaiaso i osofa’iga faafuase’i poo raids sa faia i nisi o aai.
Fai mai le BBC o le lisi o i latou o loo taofia e aofia ai ma faifeau o le lotu lea a le Zion Church, e aofia ai ma lē na amataina le lotu, o Jim Mingri lea na ave faatasi uma ma isi sui i osofa’iga ia na faia i le taeaopo o le Aso Toonai.
Fai mai e lē o iloa pe ua iai ni moliaga aloa’ia o i latou o loo taofia ae ua una’ia nei e le failautusi o le malo tele, Marco Rubio le faasa’olotoina o i latou ia.
Na ta’ua e Rubio i sana faamatalaga, ua iloa ai ii le tulaga o loo faatino e le CCP le Chinese Communist Party i tagata Kerisiano o loo filifili lava latou e tapua’i i ekalesia e lē o resitalaina.
E to’atele e lē o fiafia i le tulaga ua tula’i mai e aofia ai ma lē sa avea muamua ma Sui Peresetene o Amerika, o Mike Pence ma lē sa avea foi ma failautusi o le setete, Mike Pompeo.
Ina ua fesiligia le matāgaluega o le va i fafo a Saina i le matāupu, na faailoa ane e le sooupu latou te lē o iloa lea matāupu ae o le malo o Saina e faatonutonua atoa matāupu faalelotu i le atunuu ma puipuia le sa’olotoga o ona sitiseni ma e matua’i tetee ane i le faalavelave atu fua o Amerika ia latou matāupu faalelotu.
Puna o Faamatalaga: https://www.bbc.com/news/articles/c364n004wxzo
