E toafa tagata Ausetalia e lei maua lava iai se faamatalaga talu le mafuie i Turkey lea ua silia ma le 11 afe tagata ua maliliu ai e aofia ma tamaiti.
O le matagaluega o le va i fafo ma fefaatauaiga ua latou faailoa mai i le asō o loo tuuina atu le latou fesoasoani i le mataupu lea mo le sailia o tagata Ausetalia ia e toafa e faapea sa iai tonu i le faaitu lea e aafia i le mafuie ma e lei maua lava.
O loo galulue le matagaluega i le tuuina atu o fesoasoani tau le ofisa o le konesula ma e lata i le 40 isi tagata Ausetalia o loo iai foi i Turkey.
Ua folafola i le vaiaso nei e le Palemia o Ausetalia le $10 miliona o le fesoasoani a Ausetalia ia Turkey ma Suria ina ia fesoasoani ai i le Red Cross ma le Red Crescent o loo feagai ma galuega fesoasoani.
O le asō foi ua faimalaga ai sui e 72 o le rescue team a Ausetalia e fesoasoani atu i le aufaigaluega laveai o loo galulue nei i Turkey.
