O se alii na taofia mai e leoleo i se osofaiga na alu i le afioaga o Vaitele i le tausaga na te’a nei lea na toe tatala i tua e se resitala sinia o le Faamasinoga Sili lea o loo sailia pea e leoleo.
Ua talosagaina ai e leoleo se fesoasoani a le atunuu i le fia maua o lea taule’ale’a ia Rodney Crichton lea na tatala i tua mai le vaaiga a leoleo e se resitala sinia ao lumanai le Kerisimasi o le tausaga na tea nei.
O le osofaiga a leoleo i Vaigaga i le vaiaso nei na faaalia ai e le Sui Komesina o Leoleo Auapaau Logoitino Filipo na maua ai e leoleo se faamatalaga i le nofoaga ma agai ai lea osofaiga e faapea na vaaia ai ma lea taule’ale’a peitai e taunuu leoleo ua sola ese.
O Rodney Crichton na molia faatasi ma nisi se to’a 8 i le masina o Tesema i le tausaga ua mavae i se osofaiga i Vaitele Uta na maua ai foi fualaau faasaina o le aisa ma ni auupega o laau malosi.
O loo taofia pea leisi toafitu e aofia ai ni tamaitai ae na tatala lea taule’ale’a i tua e le resitala sinia o se faaiuga na te lē faia ae o se faamasino pe a maea ona iloiloina se talosaga e finauina e se loia.
O le vaiaso a sau e valaauina ai moliaga o i latou o loo nofo taofia ma lea taule’ale’a ae o se feiloaiga ma le sui Ofisa Sili o le Matagaluega o Faamasinoga i le faaiuga o le tausaga ua mavae ina ua tatala i tua e le resitala sinia lea tagata na ia faaalia ai o lea ua tuu atu le mataupu i le Komisi e pulea tagata faigaluega a le Mālō mo se faaiuga a le tagata faigaluega a le faamasinoga e tatalaina i Rodney Crichton.
