Ua faailoa manino e le ofisa o Lafoga a Ausetalia le Australian Tax Office poo le ATO o le a matuai faia a latou suesuega i landlords poo i latou e ana fale mautotogi o loo tuuina atu i le ofisa ni tax returns e le sa’o.
Ua faia lea fuafuaga a le ofisa i le mae’a o le iloiloga sa faia na maua ai o le 9 mai le 10 o i latou ia sa faia ni gaioiga sese ma o latou maua ai ni tupe.
Fai mai le 9News o i latou e galulue mai o latou fale aemaise i latou e faatino pisinisi mai maota ma laoa ma tagata o loo maua tupe mai falemautotogi mo sina taimi puupuu e pei o le Airbnb ma le Stayz o le a tatau foi ona faatino lelei ane le failaina o talosaga ia mo tax returns ona o se taumafaiga ina ia faamuta faiga taufaasese i lafoga.
O le iloiloga sa faia a o faailoa ai foi ma se faaputugatupe tele e fesoasoani i le ATO e pei ona folasia mai i le tala o le tupe i le vaiaso talu ai na tuuina ai le $89.6 miliona mo le ofisa o lafoga mo le lima tausaga o ana auaunaga.
Fai mai le komesina lagolago o lafoga, Tim Loh i le lipoti o le tausaga nei la o le a matuai silasila lava le ofisa i le mataupu lea i landlords ma le failaina o tax returns.
