E le’i taunuu taualumaga a le Faamasinoga Maualuga i le Aso Gafua lea sa faatulaga e amata su’esu’e ai moliaga o lē sa avea ma faia’oga ulu o le aulakapi o le Manu Samoa.
O le mafua’aga ona o se isi suiga i mau a leoleo lea ua talia e faaaogā i su’esu’ega, ma ua tolopo ai i le aso 15 o le masina fou o Me lenei matāupu tau faamasinoga e valaau ai mo le toe sa’ilia o se isi aso e valaau ai molimau.
Ua mae’a aumai se faatonuga a le faamasinoga ua tapu ai ona faasalalau su’esu’ega o moliaga se’ia mae’a lelei ma taunuu i se faai’uga, ae o le tapu foi lea ua faasā ai soo se tagata ona faia se faasalalauga i auala o fesoota’iga faaonaponei.
Ua faailoa e le faamasinoga le nofo sauni e aumai se faasalaga i le falepuipui mo i latou e lē usita’ia le poloa’iga, ae na aumai lenei tapu e aunoa ma ni mafua’aga na folasia e le Faamasino sinia o le Faamasinoga Maualuga o loo tauaveina lenei matāupu.
