Ua tau valavalaau le Pulega o Tagata Tafafao mai Fafo i ni nuu ma afioaga poo ni faalapotopotoga i lo tatou atunuu e faaulu atu ni taavale teuteu i le faamoemoe e faalauiloa ai tamaitai mai atunuu e lima, o le a saili ai se Tausala o le Pasefika, e pei ona o le a talimalo ai Samoa mai le aso 29 o Ianuari e oo i le aso 4 o le masina fou o Fepuari.
O atunuu ua mafai ona filifilia o latou sui tauva mo lea faamoemoe, o Amerika Samoa, Nauru, Papua Niu Kini, Solomona ma Samoa.
O atunuu e pei o le Atu Kuki, Fiti, Niue, ma Tonga sa le misi so latou sui tauva i tausaga ua mavae, ua le mafai ona faatino a latou sailiga mo ni tamaitai ona o le puupuu o le taimi, ma le faatoa tatala o tuaoi faavaomalo ma faamuta sā ma vavao o le faamai koviti sa mafua ai ona tolopo le sailia o se Tausala o Motu o le Pasefika i le tolu tausaga ua mavae.
O Kauhani Fuimaono o le tamaitai tauva mai Amerika Samoa, Tiare Haro o le tamaitai tauva mai le Atu Solomona, Alexandra Pitcher o le tamaitai tauva mai Nauru, mai Papua Niu Kini o le tamaitai o Josie Nicholas, ma le tausala o Samoa o le tamaitai o Haylani Kurrupu.
Ua tolu tausaga o tauave pea e le Tausala o Samoa ua mae’a lana nofoaiga le tamaitai o Fonoifafo MacFarland Seumanu le pale o le tausala o le Pasefika talu mai le tausaga e 2019, ma o le faaiuga o le tauvaga o le a faia i le vaiaso asau, o le a muta ai ma lona tauaveina o le pale o le tausala o Motu o le Pasefika.
