Ua amata i le motu o Savaii i lenei vaiaso le galuega a le ofisa o le komisi o faigapalota, o loo faatalatalanoa ai le atunuu ma sa’ili ni o latou finagalo, i le faamoemoe o le malo e teuteu le Vaega 44 o le Faavae e faasino i sui usufono o le Palemene, ma teuteuga o loo tau faaofi i le tulafono autū o faigapalota.
E iai le talitonuga o ia teuteuga o loo aga’i i le amata tatala lea o le palota mai fafo o o tatou tagatānuu i latou e agavaa.
O itumalo faapalota o Faasaleleaga Numera 1 e oo ia Faasaleleaga Numera 5 ua amata ai le galuega i le Aso Gafua lenei, lea o le a muamua faatino i le hall o le Apita o Pisaga i Salelologa mo le mamalu o le atunuu mai Faasaleleaga Tasi e oo i Faasaleleaga 3.
Ae o Faasaleleaga 4 ma le 5 e faai’u iai ma e faia i le hall a le Ekalesia Faapotopotoga Kerisiano Samoa i Lano.
O le a sosoo ai ma itumalo o Gagaemauga 1 ma le 2 i le Aso Lua, faasolosolo atu i itumalo faapalota uma i Savaii ma le faamoemoe e taualuga i le itumalo o Salesa 1 ma Salega 2 faapea Palauli muamua e oo i itumalo o Palauli 2 o Satupaitea ma Palauli 3 i le Aso Faraile o le vaiaso nei lava.
Ua mae’a nisi o itumalo o le motu o Upolu sa amata ai ia faatalatalanoaga.
O ia teuteuga o loo sa’ili iai ni finagalo o le aupalota ua faamoemoe e tuuina atu i se tauaofiaga a le Palemene i se taimi o le a mautū ai ona tapena.
