E le o pisa mai le council a Gisborne i se tapenaga o iai e ono puipuia ai tagata taeele mai le matafaga o loo tele ina alu iai otaota.
O le po o le Aso Lulu lea na maliu ai le tamaitiiti 12 tausaga le matua ina ua ta e le galu ma pa’ū ane ma toe tau lona ulu i le fafie tele o loo opeopea i le sami, ma o fafie tetele nei na aumai e tafega o le afā o Hale.
Na feiloai ai ma le council i le taeao ananafi, ma pau le tala a le pulenuu e pei ona lipotia e le Stuff o loo suesue nei poo fea na sau mai ai le tele o otaota ma fafie.
Ae mai nisi o tagata sa iai i le matafaga, o loo fesiligia pe aisea e le o faia ai se faailoilo e tapunia ai le matafaga poo se lapataiga foi e le o saogalemu mo ni taelega.
E ui i le maliu o le tamaitiiti i le po o le Aso Lulu, ae o lea lava na tatala le matafaga ananafi ma na maua e tala fou o lea ua iai masini e faamamāesea otaota nei o loo i le sami.
O le po anapo na faia ai le sauniga lotu faapitoa i le matafaga i Waikanae e manatua ai le maliu o le atalii.
