I se fa’atalatalanoaga a tusitala ma le Palemia lē tumau Tuilaepa Lupesoliai Sailele Malielegaoi i le vaiaso nei na ia tautino ai i le telē o le sasi i le fa’atinoga o le resitala mo galuega fa’avaitaimi i le amataga o le vaiaso.

Taua e Tuilaepa “O le mea moni a, sa lē tatau ona fai i gatai (EFKS Hall), lea e tele fale tetele a le Malo e pei o le Gym i Tuanaimato sa tatau ona fai ai”.

O resitala mo avanoa i galuega faavaitaimi lea na fa’asalalauina e le Matagaluega o Alamanuia ma Leipa fa’amoemoe lea e fai i le vaiaso nei mo Upolu ma Savaii. Peitai i le Aso Gafua 21 o Iuni na matuā faatumulia ai le nofoaga a le EFKS i Sogi i le mamalu o le atunuu ua lolofi atu e fia resitala mo avanoa i galuega fa’avaitaimi lea na aafia ai nisi o le atunuu ae le gata i lea na fa’aleagaina ai ma nisi o meatotino a le Ekalesia ma poloka ai foi le auala i Mulinuu.

Taua e Tuilaepa “O le mea masani lava, e tatau ona totogi e le Malo meatotino ia na fa’aleagaina”.

O lea ua toe va’ava’ai le malo i se auala e faatino ai le resitala e sili atu nai loo le auala na fai nei i le Aso Gafua ma ua toe tolopo ai lenei faamoemoe mo Upolu ma Savaii seia toe logoina mai e le Matagaluega o Pisinisi Alamanuia ma Leipa. Ua taua foi e nisi o ripoti le ono agai o le fa’atinoga o ia resitala fa’aaoga ai upega tafailagi (online registrations).