Fai mai sa fautuaina lava e pasese i totonu o lana taavale le tamaitai avetaavale e faalemu le taavale a o lei tupu le faalavelave i Whangarei lea ua maliu ai.
Lipotia i le asō i le stuff.co.nz faamatalaga o lenei faalavelave e faapea sa fautuaina lē ua maliu Trinity Rosemarie Violet Flavell e faalemu le taavale, ma o le iuga, na lavea le taavale manunua uma i latou sa iai i totonu e aofia ai ma le avetaavale e tigaina ona manuaga.
E fā aso mulimuli ane ae uma lona soifua i le falemai ae ua agiga faamataalga o lea faalavelave i le asō ina ua faalauiloa le iuga o suesuega sa faatino ma iloa ai sa iai foi faaletonu i le taavale ma sa faaaoga e le avetaavale le drug MDMA ma saoasaoa tele le taavale.
O le faalavelave na tupu i le 2020 ae ua toe alia’e ai faamatalaga i le mae’a o suesuega sa faia ma nisi o galuega toe faaleleia ua faia nei i nofoaga ia e taatele ai faalavelave tutupu.
O se faamanatu foi ua toe fafagu ai le toatele i le tāua o le tausia o le saoasaoa faatagaina i luga o auala aemaise o le saogalemu o le fanau a o sauni mo le toe amatalia o aoga.
