Atonu ua maua se ‘ai o le malaga a le Palemia o Ausetalia i Vietnam ina ua maua mai se lipoti ua faaali manino ai e le Palemia o Anthony Albanese e toalua tagata Ausetalia sa fuafua e feagai ma le faasalaga oti i Vietnam peitai ua toe faasaolotoina.
O le faatalanoaga a le Palemia ma le ABC na ia faailoa ai lea tulaga ina ua mae’a lana malaga sa iai i Vietnam, fai mai le Palemia sa ia talosaga ai mo se fesoasoani a le malo o Vietnam i le mataupu lea.
Fai mai sa ia talosagaina se fesoasoani a le Palemia o Vietnam ma e oo ane i le aoauli o le Aso Gafua ua sainia e le Palemia le poloaiga e faasaoloto ai ia tagata e toalua.
E le o mafai ona faailoa tagata ia e toalua ona o le talosaga a o la aiga ma ua maua so latou mapusaga i le tulaga ua iai le mataupu.
Saunoa foi le Palemia e umi le talaaga o le lē taliaina e Ausetalia o le faasalaga oti atoa ai ma le finau pea i upufai o malo mo ona tagata sitiseni e taofia i atunuu i fafo.
Fai mai le iipoti ua leva ona finau aiga o i laua o loo aofia i le mataupu lea mo le saila o se fesoasoani peitai o lea ua maua le fesoasoani aupito sili e tauala i le malaga a le Palemia i Vietnam.
