O le soifua maloloina o tagata e ave pea iai le faamuamua a soo se faigamalo pe a iai se fuafuaga e sii le lafoga totogi i luga o le tau o oloa e pei o taumafa suamalie, lololo, ma meaai e tele iai le masima.

E faapena foi i oloa e pei o le avamalosi ma tapaa poo sikaleti.

O le itu mautinoa a sii le totogi o lafoga i luga o tau o ia oloa, e faaopoopo ma siitia ai foi tupe maua a se Malo e fesoasoani i le faatupeina o ana fuafuaga o le atina’e o le tamaoaiga.

O lea la ua pasia e le Palemene i lana tauaofiaga i le Aso Lua o le vaiaso nei le siitaga e 15 pasene i le tau o le tapaa ma o le a faatino i totonu o le tolu tausaga.

O le tausaga faaletupe fou lenei o le a amata ai i le 5 pasene ma faasolosolo atu ai seia oo ina ausia le 15 pasene.

O se vaaiga i le siitaga fou lenei o le a oo ai le tau o le pepa lapoa e 20 sikaleti i totonu i le 16 tala.

O le tau o loo iai nei e 14 tala 60 sene.

Le afioga i le Minisita o Tiute ma Tupe Maua o le Sui Palemia, o loo auala mai ai le siitaga fou o le tau o tapaa, afioga Tuala Tevaga Iosefo Ponifasio.

Ua pasia le siitaga e ala i le tulafono taufaaofi ua mae’a talanoaina e le fono aoao faitulafono.